Die 4 Decembris
S. Petri Chrysólogi, Episc., Eccl. Doct.
Introitus: Eccli. xv: 5
In médio Ecclésiæ apéruit os ejus: et implévit eum Dóminus spiritu sapiéntiæ, et intelléctus: stolam glóriæ índuit eum. [Ps. xcii: 2] Bonum est confitéri Dómino: et psállere nómini tuo, Altíssime. v. Glória Patri. In médio.
Oratio:
Deus, qui beátum Petrum Chrysólogum Doctórem egrégium, divínitus præmonstrátum, ad regéndam et instruéndam Ecclésiam tuam éligi voluísti: præsta, quǽsumus; ut, quem Doctórem vìtæ habúimus in terris, intercessórem habére mereámur in Cælis. Per Dóminum.
Deinde Commemoratio S. Barbaræ, Vírg. et Mart.
Deus, qui inter cétera poténtiæ tuæ mirácula, étiam in sexu frágili victóriam martýri contulísti: concéde propítius; ut, qui beátæ Bárbaræ Vírginis et Mártyris tuæ natalítia cólimus, per ejus ad te exémpla gradiámur. Per Dóminum.
2 Tim. iv: 1-8
Léctio Epistolæ beáti Pauli Apóstoli ad Timótheum.
Caríssime: Testíficor coram Deo, et Jesu Christo, qui judicatúrus est
vivos et mórtuos, per advéntum ipsíus, et regnum ejus: praédica verbum,
insta opportúne, importúne: árgue, óbsecra, íncrepa in omni patiéntia, et
doctrína. Erit enim tempus, cum sanam doctrínam non sustinébunt, sed a sua
desidéria coacervábunt sibi magístros pruriéntes áuribus: et a veritáte
quidem audítum avértent, ad fábulas autem converténtur. Tu vero vígila, in
ómnibus labóra, opus fac Evangelístæ, ministérium tuum imple. Sóbrius esto.
Ego enim jam delíbor, et tempus resolutiónis meæ instat. Bonum certámen
certávi, cursum consummávi, fidem servávi. In réliquo repósita est mihi
coróna justítiæ, quam reddet mihi Dóminus in illa die justus judex: non
solum autem mihi, sed et iis, qui díligunt advéntum ejus.
Graduale Eccli. xliv: 16
Ecce sacérdos magnus, qui in diébus suis plácuit Deo.
v. [Ibid. 20]
Non est invéntus similis illi, qui conserváret legem. Excélsi.
Allelúja, allelúja. [Ps. cix: 4] Tu es sacérdos in ætérnum, secúndum
órdinem Melchísedech. Allelúja.
Matth.. v: 13-19
+
Sequéntia sancti Evangélii secúndum Matthǽum.
In illo témpore: Dixit Jesus discípulis suis: «Vos estis sal terræ. Quod si sal evanúerit, in quo saliétur? Ad níhilum valet ultra, nisi ut mittátur foras, et conculcétur ab homínibus. Vos estis lux mundi. Non potest cívitas abscóndi supra montem pósita. Neque accéndunt lucérnam, et ponent eam sub módio, sed super candelábrum, ut lúceat ómnibus qui in domo sunt. Sic lúceat lux vestra coram homínibus ut vídeant ópera vestra bona, et gloríficent Patrem vestrum, qui in cœlis est. Nolíte putáre, quóniam veni sólvere legem, aut prophétas: non veni sólvere sed adimplére. Amen quippe dico vobis, donec tránseat cœlum et terra, jóta unum, aut unus apex non præteríbit a lege, donec ómnia fiant. Qui ergo sólverit unum de mandátis istis mínimis, et dócuerit sic hómines mínimus vocábitur in regno cœlórum: qui autem fécerit et docúerit, hic magnus vocábitur in regno cœlórum.» Credo.
Offertorium: Ps. xci: 13.
Justus ut palma florébit: sicut cedrus, quæ in Líbano est, multiplicábitur.
Secreta:
Sancti Petri Chrydólogi Pontíficis tui atque Doctóris nobis, Dómine, pia non desit orátio: quæ et múnera nostra concíliet; et tuam nobis indulgéntiam semper obtíneat. Per Dóminum.
Deinde Commemoratio S. Barbaræ, Vírg. et Mart.
Súscipe, Dómine, múnera, quæ in beátæ Bárbaræ Vírginis et Martýris tuæ solemnitáte deférimus: cujus nos confídimus patrocínio liberári. Per Dóm.
Praefatio Communis vel Præfátio de Adventu
Communio: Matth. xxv: 20 et 21.
Dómine, quinque talénta tradidísti mihi: ecce alia quinque superlucrátus sum. Euge, serve bone et fidélis, quia in pauca fuísti fidélis, supra multa te constítuam, intra in gáudium Dómini tui.
Postcommunio:
Ut nobis, Dómine, tua sacrifícia dent salútem: beátus Petrus Chrysólogus Póntifex tuus et Doctor egrégius, quǽsumus, precátor accédat. Per Dominum.
Deinde Commemoratio S. Barbaræ, Vírg. et Mart.
Auxiléntur nobis, Dómine, sumpta mystéria: et, intercedénte beáta Bárbara, Vírgine et Mártyre tua, sempitérna fáciant protectióne gaudére. Per Dóminum.
