In Ascensione Dómini
I Classis cum Octava privilegata III ordinis
Introitus: Act. i: 11
Viri Galilǽi, quid admirámini aspiciéntes in cælum? allelúja: quemádmodum vidístis eum ascendéntem in cælum, ita véniet, allelúja, allelúja allelúja. [Ps. xlvi, 2]. Omnes gentes, pláudite manibus, jubiláte Deo in voce exsultatiónis. Glória Patri. Viri Galilǽi.
Oratio:
Concéde, quǽsumus, omnípotens Deus: ut, qui hodiérna die Unigénitum tuum Redemptórem nostrum as cælos ascendísse crédimus; ipsi quoque mente in cæléstibus habitémus. Per Dóminum.
Infra octavam: 2. de S. Maria.
3. contra persecutores Ecclesiæ, vel pro Papa
Act i: 1-11
Léctio Actuum Apostolórum.
Primum
quidem sermónem feci de ómnibus, o Theóphile, quæ cœpit Jesus fácere et
docére, usque in diem qua præcípiens Apóstolis per Spíritum Sanctum, quos
elégit, assumptus est; quibus et prǽbuit seípsum vivum post passiónem
suam in multis arguméntis, per dies quadragínta appárens eis, et loquens de
regno Dei. Et convéscens, præcépit eis ab Jerosólymis ne discéderent, sed
expectárent promissiónem Patris, quam audístis (inquit) per os meum; quia Joánnes
quidem baptizávit aqua, vos autem baptizabímini Spíritu Sancto non post
multos hos dies. Igitur qui convenérant interrogábant eum dicéntes: «Dómine
si in témpore hoc restítues regnum Israël?» Dixit autem eis: «Non est
vestrum nosse témpora vel moménta quæ Pater pósuit in sua potestáte: sed
accipiétis virtútem superveniéntis Spíritus Sancti in vos, et éritis mihi
testes in Jerúsalem et in omni Iudǽa, et Samaría, et usque ad últimum
terræ.» Et cum hæc dixísset, vidéntibus illis, elevátus est, et nubes suscépit
eum ab óculis eórum. Cumque intueréntur in cælum eúnte illum, ecce duo viri
adstitérunt juxta illos in véstibus albis, qui et dixérunt: «Viri Galilǽi,
quid statis aspiciéntes in cælum? Hic Jesus, qui assúmptus est a vobis in cælum,
sic véniet, quemádmodum vidístis eum eúntem in cælum.»
Allelúja, allelúja. [Ps. xlvi] Ascéndit Deus in jubilatióne, et Dóminus in voce tubæ. Allelúja. [Ps. lxvii] Dóminus in Sina in sancto, ascéndens in altum, captívam duxit captivitátem. Allelúja
Marc. xvi: 14-20
+
Sequéntia sancti Evangélii secúndum Marcum.
In illo témpore: Recumbéntibus illis úndecim appáruit illis Jesus: et exprobrávit incredulitátem eórum et durítiam cordis: quia his qui víderant eum resurrexísse non credidérant. Et dixit eis: «Eúntes in mundum univérsum, prædicáte Evangélium omni creatúræ. Qui credíderit et baptizátus fúerit, salvus erit; qui vero non credíderit condemnábitur. Signa autem eos, qui credíderint, hæc sequéntur: In nómine meo dæmónia ejícient; linguis loquéntur novis; serpéntes tollent; et si mortíferum quid bíberint, non eis nocébit: super ægros manus impónent, et bene habébunt.» Et Dóminus quidem Jesus, postquam locútus est eis, assúmptus est in cælum, et sedit a dextris Dei. Illi autem profécti prædicavérunt ubique, Dómino cooperánte et sermónem confirmánte, sequéntibus signis.
Dicto
Evangelio exstinguitur Cereus paschalis, nec ulterius accenditur,
nisi in Sabbato Pentecostes ad benedictionem Fontis.
Credo.
Offertorium: Ps. xlvi: 6.
Ascéndit Deus in jubilatióne, et Dóminus in voce tubæ, allelúja.
Secreta:
Súscipe, Dómine, múnera, quæ pro Fílii tui gloriósa Ascensióne deférimus: et concéde propítius; ut a præséntibus periculis liberemur, et ad vitam perveniámus ætérnam. Per Dóminum.
Infra octavam: 2. de S. Maria.
3. contra persecutores Ecclesiæ, vel pro Papa
Præfátio et Communicántes propria per totam Octavam
Communio: Ps. lx: 33-34
Psálite Dómino, qui ascéndit super cælos cælorum ad Oriéntem, allelúja..
Postcommunio:
Presta, nobis, quǽsumus, omnípotens et miséricors Deus: ut, quæ visibílibus mystériis suménda percépimus, invisíbili consequámur efféctu. Per Dominum.
Infra octavam: 2. de S. Maria.
3. contra persecutores Ecclesiæ, vel pro Papa
