Feria II post Dominicam IV in Quadragesima

Feria II post Dominicam IV in Quadragesima
Statio ad Ss. Quatuor Coronatos

Introitus. Ps. liii: 3-4.

Deus, in nómine tuo salvum me fac, et in virtúte tua líbera me: Deus, exáudi oratiónem meam: áuribus pércipe verba oris mei. Ps. ibid., 5 Quóniam aliéni insurrexérunt in me: et fortes quæsiérunt ánimam meam. Glória Patri. Deus in.

Oratio.

Pæsta, quǽsumus, omnípotens Deus: ut, observatiónes sacras ánnua devotióne recoléntes, et córpore tibi placeámus et mente. Per Dóminum.

2° ad poscenda suffragia Sanctorum.
3° pro vivis et defunctis.

3 Reg. iii: 16-28.

Léctio libri Regum.
In diébus illis: Venérunt duæ mulíeres meretríces ad regem Salomónem, steterúntque coram eo, quarum una ait: «Obsecro, mi dómine: ego et múlier hæc habitabámus in domo una et péperi apud eam in cubículo. Tértia autem die postquam ego péperi, péperit et hæc: et erámus simul, nullúsque álius nobíscum in domo, excéptis nobis duábus. Mórtuus est autem fílius mulíeris hujus nocte: dórmiens quippe oppréssit eum. Et consúrgens intempéstæ noctis siléntio, tulit fílium meum de látere meo ancíllæ tuæ dormiéntis, et collocávit in sinu suo: suum autem fílium, qui erat mórtuus, pósuit in sinu meo. Cumque surrexíssem mane, ut darem lac fílio meo, appáruit mórtuus: quem diligéntius íntuens clara luce, deprehéndi non esse meum, quem genúeram.» Respondítque áltera múlier: «Non est ita, ut dicis, sed fílius tuus mórtuus est, meus autem vivit.» «E contrário» illa dicébat: «Mentiris: fílius quippe meus vivit, et fílius tuus mórtuus est.» Atque in hunc modum contendébant coram rege. Tunc rex ait: «Haec dicit Fílius meus vivit, et fílius tuus mórtuus est. Et ista respóndit: Non, sed fílius tuus mórtuus est, meus autem vivit.» Dixit ergo rex: «Affért mihi gládium.» Cumque attulíssent gládium coram rege: «Divídite inquit, infántem vivum in duas partes, et dat dimídiam partem uni, et dimídiam partem alteri.» Dixit autem múlier, cujus fílius erat vivus, ad regem (commóta sunt quippe víscera ejus super fílio suo): «Obsecro, dómine date illi infántem vivum, et nolíte interfícere dum.» «E contrário» illa dicebat: «Nec mihi nec tibi sit, sed dividátur.» Respóndit rex et ait: «Date huic infántem vivum, et non occidátur: hæc est enim mater ejus.» Audívit itaque omnis Israel judícium quod judicásset rex, et timuérunt regem, vidéntes sapiéntiam Dei esse in eo ad faciéndum judícium.

Graduale. Ps. xxx: 3.

Esto mihi in Deum protectórem et in locum refúgii, ut salvum me fácias. Ps. lxx: 1 Deus, in te sperávi: Dómine, non confúndar in ætérnum.

Tractus.Ps.cii: 10

Dómine, non secúndum peccáta nostra, quæ fécimus nos: neque secúndum iniquitátes nostras retríbuas nobis. Ps. lxxviii: 8-9 Dómine, ne memíneris iniquitátum nostrárum antiquárum: cito antícipent nos misericórdiæ tuæ, quia páuperes facti sumus nimis. (Hic genuflectitur) Adjuva nos, Deus, salutáris noster: et propter glóriam nóminis tui, Dómine, líbera nos: et propítius esto peccátis nostris, propter nomen tuum.

Joann. ii: 13-25.

Sequéntia sancti Evangélii secúndum Joánnem.

In illo témpore: Prope erat Pascha Judæórum, et ascéndit Jesus Jerosólymam: et invénit in templo vendéntes boves et oves et colúmbas, et nummulários sedéntes. Et cum fecísset quasi flagéllum de funículis, omnes ejécit de templo, oves quoque et boves, et nummulariórum effúdit æs et mensas subvértit. Et his, qui colúmbas vendébant dixit: «Auférte ista hinc, et nolíte fácere domum Patris mei domum negotiationis. Recordáti sunt vero discipuli ejus, quia scriptum est: «Zelus domus tuæ comédit me.»» Respondérunt ergo Judǽi, et dixérunt ei: «Quod signum osténdis nobis, quia hæc facis?» Respóndit Jesus et dixit eis: «Sólvite templum hoc et in tribus diébus excitábo illud.» Dixérunt ergo Judǽi: «Quadragínta et sex annis ædificátum est templum hoc, et tu in tribus diébus excitábis illud?» Ille autem dicébat de templo córporis sui. Cum ergo resurrexísset a mórtuis, recordáti sunt discípuli ejus, quia hoc dicébat, et credidérunt Scriptúrae, et sermóni quem dixit Jesus. Cum autem esset Jerosólymis in Pascha in die festo, multi credidérunt in nómine ejus, vidéntes signa ejus, quæ faciébat. Ipse autem Jesus non credébat semetípsum eis, eo quod ipse nosset omnes et quia opus ei non erat, ut quis testimónium perhibéret de hómine: ipse enim sciébat, quid esset in hómine.

Offertorium. Ps. ic: 1-2

Jubiláte Deo, omnis terra, servíte Dómino in lætítia: intráte in conspéctu ejus in exsultatióne: quia Dóminus ipse est Deus.

Secreta.

Oblátum tibi, Dómine, sacrifícium vivíficet nos semper et múniat. Per Dóminum.

2° ad poscenda suffragia Sanctorum.
3° pro vivis et defunctis.

Præfatio de Quadragesima.

Communio. Ps. xviii: 13 et 14

Ab occúltis meis munda me, Dómine: et ab aliénis parce servo tuo.

Postcommunio.

Sumptis, Dómine, salutáribus sacraméntis: ad redemptiónis ætérnæ, quǽsumus, proficiámus augméntum. Per Dóminum.

2° ad poscenda suffragia Sanctorum.
3° pro vivis et defunctis.

Super populum:

Orémus. Humiliáte cápita vestra Deo.

Oratio.

Deprecatiónem nostram quǽsumus. Dómine, benígnus exáudi: et, quibus supplicándi præstas afféctum, tríbue defensiónis auxílium. Per Dóminum.

V. Benedicámus Dómino
R. Deo grátias.