Die 29 Decembris
S. Thomæ, Episc. et Mart.

Introitus:

Gaudeámus omnes in Dómino diem festum celebrántes sub honóre beáti Thomæ Mártyris: de cujus passióne gaudent Angeli, et colláudant Fílium Dei. [Ps. xxxii, 1] Exsultáte, justi, in Dómino: rectos decet collaudátio. Glória Patri Gaudeámus.

Collect:

Deus, pro cujus Ecclésia glorósus Póntifex Thomas gládiis impiórum occúbuit: præsta, quǽsumus; ut omnes, qui ejus implórant auxílium, petitiónis suæ salutárem consequántur efféctum. Per Dóminum.

Et fit Commemoratio Octavæ Nativitátis:

Concéde, quǽsumus, omnípotens Deus: ut nos Unigéniti tui nova per carnem Natívitas líberet; quos sub peccáti jugo vetústa sérvitus tenet. Per eúmdem Dominum.

Heb. v: 1-6

Léctio Epístolæ beáti Pauli Apóstoli ad Hebrǽos.
Fratres: Omnis Póntifex ex homínibus assúmptus, pro homínibus constitúitur in iis, quæ sunt ad Deum, ut ófferat dona, et sacrifícia pro peccátis: qui condolére possit iis, qui ignórant, et errant: quóniam et ipse circúmdatus est infirmitáte: et proptérea debet, quemádmodum pro pópulo, ita étiam et pro semetípso offérre pro peccátis. Nec quisquam sumit sibi honórem, sed qui vocátur a Deo tamquam Aaron. Sic et Christus non semetípsum clarificávit ut póntifex fíeret: sed qui locútus est ad eum: «Fílius meus es tu, ego hódie génui te.» Quemádmodum et in alio loco dicit: «Tu es sacérdos in ætérnum secúndum órdinem Melchísedech.»

Graduale Eccli xliv: 16

Ecce sacérdos magnus, qui in diébus suis plácuit Deo. v. [Ibid. 20] Non est invéntus símilis illi, qui conserváret legem Excélsi.
Allelúia, allelúia. [Joann. x: 14] Ego sum pastor bonus: et cognósco oves meas, et cognóscunt me meæ. Allelúja.

Joann. x: 11-16
+
Sequéntia sancti Evangélii secúndum Joánnem.

In illo témpore: Dixit Jesus pharisǽis: «Ego sum pastor bonus. Bonus pastor ánimam suam dat pro óvibus suis. Mercenárius autem et qui non est pastor, cujus non sunt oves própriæ, videt lupum veniéntem, et dimíttit oves et fugit: et lupus rapit et dispérgit oves: Mercenárius autem fugit, quia mercenárius est, et non pértinet ad eum de óvibus. Ego sum pastor bonus et cognósco meas et cognóscunt me meæ. Sicut novit me Pater et ego agnósco Patrem: et animam meam pono pro óvibus meis. Et álias oves hábeo, quæ non sunt ex hoc ovíli: et illas opórtet me addúcere, et vocem meam áudient, et fiet unum ovíle et unus pastor.»

Credo, ratione Octavæ.

Offertorium: Ps. xx: 4, 5

Posuísti, Dómine, in cápite ejus corónam de lapide pretióso: vitam pétiit a te, et tribuísti ei, allelúja.

Secreta:

Múnera tibi, Dómine, dicata sanctífica et, intercedénte beáto Thoma Mártyre tuo atque Pontífice, per éadem nos placátus inténde. Per Dóminum.

Pro Octava Nativitátis:

Obláta, Dómine, múnera, nova Unigéniti tui nativitáte sanctífica: nosque a peccatórum nostrórum máculis emúnda. Per Dominum.

Præfátio et Communicántes de Nativitáte, ratione Octavæ

Communio: Joann. l0: 14

Ego sum pastor bonus, allelúja: et cognósco oves meas, et cognóscunt me meæ.

Postcommunio:

Hæc nos commúnio, Dómine purget a crímine: et, intercedénte beáto Thoma Mártyre tuo atque Pontífice, cæléstis remédii faciat esse consórtes. Per Dóminum.

Pro Octava Nativitátis

Præsta, quǽsumus, omnípotens Deus: ut natus hódie Salvátor mundi, sicut divínæ nobis generatiónis est auctor; ita et immortalitátis sit ipse largítor. Qui tecum.