Die 26 Septembris - Ss. Isaac Jogues, Joannis de Brébeuf et Sociórum, Martyrum

In aliquibus Diœcesibus Statuum Federatórum Américæ

Die 26 Septembris
Ss. Isaac Jogues, Joannis de Brébeuf et Sociórum, Martyrum

Introitus: Apoc. vii: 14

Hi sunt qui venérunt de tribulatióne magna, et lavérunt stolas suas, et dealbavérunt eas in sánguine Agni. [Ps. cxvi: 1] Laudáte Dóminum, omnes gentes; laudáte eum omnes pópuli. v. Glória Patri. Hi sunt.

Oratio:

Deus, qui primítias fídei in boreális Américæ regiónibus sanctórum Mártyrum tuórum Isaáci, Joánnis, eorúmque Sociórum prædictióne et sánguine consecrásti: concéde propítius: ut, eórum intercessióne, flórida christianórum seges ubíque in dies augeátur. Per Dóminum.

Et fit Commemoratióne Ss. Cypriani et Justinæ, Martyrum (P);
in Missis privatis tantum.

Beatórum Mártyrum Cypriáni et Justínæ nos, Dómine, fóveant continuáta præsídia: quia non désinis propítius intuéri, quos tálibus auxíliis concésseris adjuvári. Per Dóminum.

2 Cor. xii: 11-15

Lectio Epístolæ beáti Pauli Apóstoli ad Corínthios.
Fratres: Ego a vobis débui commendári: nihil enim minus fui ab iis qui sunt supra modum Apóstoli, tamétsi nihil sum. Signa tamen apostolátus mei facta sunt super vos, in omni patiéntia, in signis et prodígiis et virtútibus. Quid est enim quod minus habuístis præ céteris ecclésiis, nisi quod ipse non gravávi vos? Donáte mihi hanc injúriam. Ecce tértio hoc parátus sum veníre ad vos; et non ero gravis vobis. Non enim quæro quæ vestra sunt, sed vos; nec enim debent fílii paréntibus thesaurizáre, sed paréntes fíliis. Ego autem libénter impéndam et superimpéndar ipse pro animábus vestris: licet plus vos díligens, minus díligar.

Graduale Ps. cxxiii: 7-8

Anima nostra sicut passer erépta est de láqueo venántium. v. Láqueus contrítus est, et nos liberáti sumus: adjutórium nostrum in nómine Dómini, qui fecit cælum et terram.
Allelúja, allelúja. v. [2 Cor. i: 5] Sicut abúndant passiónes Christi in nobis, ita et per Christum abúndat consolátio nostra, Allelúja.

Post Septuagesima, omissis Allelúja, et Versu sequenti, dicitur

Tractus: Ps. cxxv: 5-6

Qui séminannt in lácrimis, in gáudio metent. v. Eúntes ibant et flebant, mitténtes sémina sua. v. Veniéntes autem vénient cum exsultatióne, portántes manípulos suos.

Tempore autem Paschali:

Allelúja, allelúja. v. [2 Cor. i: 5] Sicut abúndant passiónes Christi in nobis, ita et per Christum abúndat consolátio nostra, Allelúja. v. [Ex. xv: 11] Gloriósus Deus in Sanctis suis: mirábilis in majestáte fáciens prodígia, allelúja.

Luc. vi: 17-23

+ Sequéntia sancti Evangélii secúndum Lucam.
In illo témpore: Descéndens Jesus de monte, stetit in loco campéstri, et turba discipulórum ejus, et multitúdo copiósa plebis ab omni Judǽa, et Jerúsalem, et marítima, et Tyri, et Sidónis, qui vénerant, ut audírent eum, et sanaréntur a languóribus suis. Et qui vexabántur a spirítibus immúndis, curabántur. Et omnis turba quærébat eum tángere: quia virtus de illo exíbat, et sanábat omnes. Et ipse elevátis óculis in discípulos suos, dicébat: «Beáti páuperes: quia vestrum est regnum Dei. Beáti, qui nunc esúritis, quia saturabímini. Beáti, qui nunc fletis: quia ridébitis. Beáti éritis, cum vos óderint hómines, et cum separáverint vos, et exprobráverint, et ejécerint nomen vestrum tamquam malum, propter Fílium hóminis. Gaudéte in illa die, et exsultáte: ecce enim merces vestra multa est in cælo.»

Offertorium: Sap. iii: 6.

Tamquam aurum in fornáce probávit illos Dóminus, et quasi holocáusti hóstiam accépit illos.

Secreta:

Immaculátam hóstiam fac nos, Dómine, méntibus tibi puris offérre, quam sanctis Martyribus tuis illibátus vitæ candor et juge mortificatiónis stúdium dapem suavíssimam efficiébant. Per Dominum.

Secreta de Ss Cypriáni et Justínæ:

Munera tibi, Dómine, nostræ devotiónis offérimus: quæ et pro tuórum tibi grata sint honóre justórum, et nobis salutária, te miseránte, reddántur. Per Dóminum.

Praefatio Communis

Communio: Philipp. i: 20-21

Magnificábitur Christus in córpore meo, sive per vitam sive per mortem: mihi enim vívere Christus est et mori lucrum.

Postcommunio:

Fortium pane reféctis tríbue nobis, omnípotens Deus: ut, sicut sancti Mártyres tui Isaácus, Joánnes eorúmque Sócii, eódem roboráti, ánimam suam pro frátribus pónere non dubitárunt; ita nos, alter altérius ónera portántes, próximos nostros ópere et veritáte diligámus. Per Dóminum.

Postcommunio de Ss Cypriáni et Justínæ:

Præsta nobis, quǽsumus Dómine: intercedéntibus sanctis Martýribus tuisCypriáno et Justína; ut, quod ore contíngimus, pura mente capiámus. Per Dóminum.