Regína sacratíssimi Rosárii, ora pro nobis!
  

Sabbato in Vigilia Pentecostes
Statio ad S. Joannem in Laterano

[Blessing of Holy Water]

Cum sanctificátus fúero in vobis, congregábo vos de univérsis terris: et effúndam super vos aquam mundam, et mundabímini ab ómnibus inquinaméntis vestris: et dabo vobis spíritum novum, allelúja, allelúja. [Ps. xxxiii: 2] Benedícam Dóminum in omni témpore: semper laus ejus in ore meo. v. Glória Patri.

Deinde dicitur Kýrie eléison, et Glória in excélsis Deo.

Præsta, quǽsumus omnípotens Deus: ut claritátis tuæ super nos splendor effúlgeat; et lux tuæ lucis corda eórum, qui per grátiam tuam renáti sunt, Sancti Spíritus illustratióne confírmet. Per Dóminum ... in unitáte ejúsdem.

Léctio Actuum Apostolórum.
In diébus illis: Factum est, cum Apóllo esset Corínthi, ut Paulus peragrátis superióribus pártibus veníret Ephesum, et inveníret quosdam discípulos: dixítque ad eos: «Si Spíritum Sanctum accepístis credéntes?» At illi dixérunt ad eum: «Sed neque si Spíritus Sanctus est, audívimus.» Ille vero sit: «In quo ergo baptizáti estis?» Qui dixérunt: «In Joánnis baptísmate.» Dixit autem Paulus: «Joánnes baptizávit baptísmo pœniténtiæ pópulum, dicens: “In eum, qui ventúrus esset post ipsum, ut créderent, hoc est, in Jesum.”» His audítis, baptizáti sunt in nómine Dómini Jesu. Et cum imposuísset illis manus Paulus, venit Spíritus Sanctus super eos, et loquebántur linguis, et prophetábant. Erant autem omnes viri fere duódecim. Introgréssus autem synagógam, cum fidúcia loquebátur per tres menses, dísputans, et suádens de regno Dei.

Allelúja. Confitémini Dómino, quóniam bonus: quóniam in sǽculum misericórdia ejus.

Non repetitur Allelúja, sed immediate sequitur:

Laudáte Dóminum omnes gentes: et collaudáte eum omnes pópuli. v. Quóniam confirmáta est super nos misericórdia ejus: et véritas Dómini manet in ætérnum.

Joann. xiv: 15-21
+
Sequéntia sancti Evangélii srcúndum Joánnem.

In illo témpore: Dixit Jesus discípulis suis: «Si dilígitis me: mandáta mea serváte. Et ego rogábo Patrem, et álium Paráclitum dabit vobis, et maneat vobíscum in ætérnum, Spíritum veritátis, quem mundus non potest accípere, quia non videt eum, nec scit eum. Vos autem cognoscétis eum; quia apud vos manébit, et in vobis erit. Non relínquam vos órphanos: veniam ad vos. Adhuc módicum: et mundus me jam non videt. Vos autem vidétis me, quia ego vivo, et vos vivétis. In illo die vos cognoscétis quia ego sum in Patre meo, et vos in me, et ego in vobis. Qui habet mandáta mea, et servat ea: ille est, qui díligit me. Qui autem díligit me, diligétur a Patre meo: et ego díligam eum, et manifestábo ei meipsum.» 

Non dicitur Credo.

Emitte spíritum tuum, et creabúntur, et renovábis fáciem terræ: sit glória Dómini in sǽcula, allelúja.

Múnera, quǽsumus, Dómine, obláta sanctífìca: et corda nostra Sancti Spíritus illustratióne emúnda. Per Dóminum ... in unitáte ejúsdem.

Prefatio Communicántes et Hanc igitur propria de Pentecoste: quæ dicuntur usque ad Sabbatum sequens inclusive.

Ultimo festivitátis die dicébat Jesus: «Qui in me credit, flúmina de ventre ejus fluent aquæ vivæ»: hoc autem dixit de Spíritu, quem acceptúri erant credéntes in eum, allelúja, allelúja.

Sancti Spíritus, Dómine, corda nostra mundet infúsio: et sui roris íntima aspersióne fœcúndet. Per Dóminum ... in unitáte ejúsdem.

Dei via est íntegra
Our Lady of the Rosary, 144 North Federal Highway (US#1), Deerfield Beach, Florida 33441  954+428-2428
Authentic  Catholic Mass, Doctrine, and Moral Teaching -- Don't do without them -- 
Don't accept one without the others!