Dóminica Sexta quæ superfuit post Epiphaniam
II classis
English Text
Introitus: Jerem. xxix: 11, 12, et 14
Dicit Dóminus: Ego cógito
cogitatiónes pacis et non adflictiónis. Invocábitis me et Ego exáudiam vos
et redúcam captivitátem vestram de cunctis locis. [Ps. lxxxiv: 2]
Benedixísti, Dómine, terram tuam: avertísti captivitátem Jacob. Gloria
Patri. Dicit Dóminus.
Oratio:
Presta, quǽsumus, omnípotens Deus: ut semper rationabília meditántes,
qui tibi sunt plácita, et dictis exsequámur, et factis. Per Dóminum.
2. ad poscenda suffragia Sanctorum. 3. Ad libitum eligenda.
I ad Thessalonicénses i: 2-10
Léctio Epistolæ beáti Pauli Apóstoli ad Thessalonicénses:
Fratres: Grátias ágimus Deo semper pro ómnibus vobis, memóriam faciéntes
in oratiónibus nostris sine intermissióne, mémores óperis fidei vestræ et
labóris, et caritátis, et sustinéntiæ spei Dómini nostri Jesu Christi, ante
Deum et Patrem nostrum: sciéntes fratres, dilécti a Deo, electiónem vestram:
quia evangélium nostrum non fuit ad vos in sermóne tantum, sed et in virtúte,
et in Spíritu Sancto, et in plenitúdine multa, sicut scitis quales fuérimus
vobis propter vos. Et vos imitatóres nostri facti estis, et Dómini,
excipiéntes verbum in tribulatióne multa, cum gáudio Spíritus Sancti: ita ut
facti sitis forma ómnibus credéntibus in Macedónia et in Acháia. A vobis
enim diffamátus est sermo Dómini, non solum in Macedónia, et in Acháia, sed
in omni loco fides vestra, quae est ad Deum, profécta est, ita ut non sit nobis
necésse quidquam loqui. Ipsi enim de nobis annúntiant qualem intróitum
habuérimus ad vos: et quomodo convérsi estis ad Deum a simulácris servíre
Deo vivo, et vero, et expectáre Fílium ejus de cælis (quem suscitávit ex
mórtuis) Jesum qui erípuit nos ab ira ventúra.
Graduale: Ps. xliii: 8-9
Liberásti
nos, Dómine, ex adfligéntibus nos: et eos qui nos odérunt confudísti. In Deo
laudábimur tota die et in nómine tuo confitébimur in sǽcula.
Allelúia,
allelúia. [Ps.cxxix: 1-2] De profúndis clamávi ad te, Dómine; Dómine,
exáudi oratiónem meam. Allelúia
Matthew xiii: 31-35
†
Sequéntia sancti Evangélii secúundum Matthæum.
In illo tempore: Dixit Jesus turbis parábolam hanc: Simile est regnum cælórum
grano sinápis, quod accípiens homo seminávit in agro suo: quod mínimum
quidem est ómnibus semínibus: cum autem créverit majus est ómnibus
oléribus, et fit arbor, ita ut vólucres cæli véniant, et hábitent in ramis
eius. Aliam parábolam locútus est eis: Simile est regnum cælórum ferménto
quod accéptum múlier abscóndit in farínae satis tribus, donec fermentátum
est totum. Hæc ómnia locútus est Jesus in parábolis ad turbas: et sine
parábolis non loquebátur eis: ut implerétur quod dictum erat per Prophétam
dicéntem: "Apériam in parábolis os meum, eructábo abscóndita a
constitutióne mundi.
Credo.
Offertorium: Ps.cxxix: 1-2
De profúndis clamávi ad te, Dómine; Dómine,
exáudi oratiónem meam. De profúndis clamávi ad te, Dómine.
Secreta:
Hæc nos oblátio, Deus, mundet, quǽsumus, et rénovet, gubérnet, et
prótegat. Per Dóminum.
2. ad poscenda suffragia Sanctorum. 3. Ad libitum eligenda.
Preface of the Trinity.
Communio: Marc xi: 24
Amen dico vobis, quidquid orántes pétitis, crédite
quia accipiétes, et fiet vobis.
Postommunio:
Cæléstibus, Dómine, pasti delíciis: quǽsumus: ut semper éadem, per
quæ veráciter vívimus appetámus. Per Dóminum.
2. ad poscenda suffragia Sanctorum. 3. Ad libitum eligenda.
