Dominica Vigesima Prima post Pentecosten
2nd Classis
[English Text]
Introitus: Esther 13: 9, 10-11
In voluntáte tua, Dómine, univérsa sunt pósita, et non est qui possit
resístere voluntáti tuæ: tu enim fecísti ómnia, cælum et terram, et
univérsa quæ in cæli ámbitu continéntur: Dóminus universórum tu es. [Ps. cxviii, 1]. Beáti immaculáti in via: qui ámbulant in lege
Dómini. Glória Patri. In voluntáte.
Collect:
Famíliam tuam, quǽsumus, Dómine, contínua pietáte custódi: ut a
cunctis adversitátibus, te protegénte, sit líbera: et in bonis áctibus tuo
nómini sit devóta. Per Dóminum.
2. ad poscenda suffragia Sanctorum. 3.
ad libitum eligenda
Ephesios vi: 10-17
Léctio Epístolæ beáti Pauli Apóstoli ad Ephésios.
Fratres: Confortámini in Dómino, et in poténtia virtútis ejus. Indúite
vos armatúram Dei, ut possítis stare advérsus insidias Diáboli. Quóniam non
est nobis colluctátio advérsus carnem et sánguinem; sed advérsus príncipes
et potestátes, advérsus mundi rectóres tenebrárum harum, contra spirituália
nequítiae in cæléstibus. Proptérea accépite armatúram Dei, ut possítis
resístere in die malo, et in ómnibus perfécti stare. State ergo succíncti
lumbos vestros in veritáte et indúti lorícam justítiæ, et calceáti pedes
in præparatióne Evangélii pacis: in ómnibus suméntes scutum fídei, in quo
possítis ómnia tela nequíssimi ígnea extínguere: et gáleam salútis
assúmite: et gládium spíritus, quod est verbum Dei.
Graduale Ps. lxxxix: 1-2
Dómine, refúgium factus es nobis, a generatióne et progénie. V.
Priúsquam montes fíerent, aut formarétur terra et orbis: a sǽculo,
et usque in sǽculum tu es Deus.
Allelúja, allelúja. [Ps. cxiii: 1] In éxitu
Israël de Ægýpto, domus Jacob de pópulo bárbaro. Allelúja.
Matt. xviii: 23-35
† Sequéntia sancti Evangélii secúndum Matthǽum.
In illo témpore: Dixit Jesus discípulis suis parábolum hanc: Assimilátum
est regnum cælórum hómini regi qui vóluit ratiónem pónere cum servis suis.
Et cum cœpísset ratiónem pónere, oblátus est ei unus, qui debébat decem
míllia talénta. Cum autem non habéret unde rédderet, jussit eum dóminus
venúmdari, et uxórem ejus, et fílios, et ómnia quæ habébat, et reddi.
Prócidens autem servus ille, orábat eum, dicens: "Patiéntiam habe in me,
et ómnia reddam tibi." Misértus autem dóminus servi illíus, dimísit
eum, et débitum dimísit ei. Egréssus autem servus ille, invénit unum de
consérvis suis, qui debébat ei centum denários: et tenens suffocábat eum,
dicens: "Redde quod debes." Et prócidens consérvus ejus rogábat
eum, dicens: "Patiéntiam habe in me, et ómnia reddam tibi." Ille
autem nolúit, sed ábiit, et misit eum in cárcerem donec rédderet débitum.
Vidéntes autem consérvi ejus quae fiébant, contristáti sunt valde: et
venérunt et narravérunt dómino suo ómnia quæ facta fúerant. Tunc vocávit
illum dóminus suus, et ait illi: "Serve nequam, omne débitum dimísi
tibi, quóniam rogásti me: nonne ergo opórtuit et te miseréri consérvi tui,
sicut et ego tui misértus sum?" Et irátus dóminus ejus, trádidit eum
tortóribus, quoadúsque rédderet univérsum débitum. Sic et Pater meus
cæléstis fáciet vobis, si non remiséritis unusquisque fratri suo de
córdibus vestris.
Credo.
Offertorium: Job 1.
Vir erat in terra Hus, nómine Job: simplex et rectus, ac timens Deum: quem
Satan pétiit, ut tentet: et data est ei potéstas a Dómino in facultátes, et
in carnem ejus: perdítque omnem substántiam ipsíus, et fílios: carnem quoque
ejus gravi úlcere vulnerávit.
Secreta:
Súscipe, Dómine, propítius hóstias: quibus et te placári voluísti, et
nobis salútem poténti pietáte réstitui. Per Dóminum.
2. ad poscenda suffragia Sanctorum. 3.
ad libitum eligenda
Præfatio de Ssma Trinitate
Communio: Ps. cx: 81, 84 et 86
In salutári tuo ánima mea, et in verbum tuum sperávi: quando fácies de
persequéntibus me judícium? iníqui persecúti sunt me, ádjuva me, Dómine,
Deus meus.
Postcommunio:
Immortalitátis alimóniam consecúti, quǽsumus, Dómine Deus, ut quod
ore percépimus, pura mente sectémur. Per Dominum.
2. ad poscenda suffragia Sanctorum. 3.
ad libitum eligenda