Dominica Decima Septima Post Pentecosten
II Classis

English Text

Introitus: Ps. cxviii: 137 et 124

Justus es, Dómine, et rectum judícium tuum: fac cum servo tuo secúndum misericórdiam tuam. [Ps. ibid., 1]. Beáti immaculáti in via: qui ámbulant in lege Dómini. Glória Patri. Justus.

Collect:

Da, quǽsumus, Dómine, pópulo tuo diabólica vitáre contágia: et te solum Deum pura mente sectári. Per Dóminum.

2. ad poscenda suffragia Sanctorum.3. ad libitum eligenda

Ephes: iv: 1-6

Léctio Epístolæ beáti Pauli Apóstoli ad Ephésios.
Fratres: Obsecro vos ego vinctus in Dómino, ut digne ambulétis vocatióne qua vocáti estis, cum omni humilitáte, et mansuetúdine, cum patiéntia subportántes ínvicem in caritáte, sollíciti serváre unitátem spíritus in vínculo pacis. Unum corpus, et unus spíritus, sicut vocáti estis in una spe vocatiónis vestræ. Unus Dóminus, una fides, unum baptisma. Unus Deus, et Pater ómnium, qui est super omnes, et per ómnia, et in ómnibus nobis. Qui est benedíctus in sǽcula sæculórum. Amen.

Graduale Ps. xxxii: 12 et 6

Beáta gens, cujus est Dóminus Deus eórum: pópulus, quem elégit Dóminus in hereditátem sibi.  Verbo Dómini cæli firmáti sunt: et spíritu oris ejus omnis virtus eórum.

Allelúja, allelúja. [Ps. ci: 2] Dómine exáudi oratiónem meam, et clamor meus ad te véniat.. Allelúja.

Matt. xxii: 34-46
+
Sequéntia sancti Evangélii secúndum Matthǽum.

In illo témpore:. Accessérunt ad Jesum pharisǽi: et interrogávit eum unus ex eis legis doctor, temptans eum: "Magíster quod est mandatum magnum in lege?" Ait illi Jesus: "Díliges Dóminum Deum tuum ex toto corde tuo, et in tota ánima tua, et in tota mente tua. Hoc est máximum et primum mandátum. Secúndum autem símile est huic: díliges próximum tuum sicut te ipsum. In his duóbus mandátis univérsa lex pendet, et prophétæ." Congregátis autem pharisǽis, interrogávit eos Jesus, dicens: "Quid vobis vidétur de Christo? cujus fílius est?" Dicunt ei: "David." Ait illis: "Quomodo ergo David in spíritu vocat eum Dóminum, dicens: 'Dixit Dóminus Dómino meo, sede a dextris meis, donec ponam inimícos tuos scabéllum pedum tuórum'? Si ergo David vocat eum Dóminum, quómodo fílius ejus est?" Et nemo póterat respondére ei verbum: neque ausus fuit quisquam ex illa die eum ámplius interrogáre.

Credo.

Offertorium: Dan: ix: 17, 18, et 19.

Orávi Deum meum ego Dániel, dicens: "Exáudi, Dómine, preces servi tui: illúmina fáciem tuam super sanctuárium tuum: et propítius inténde pópulum istum, super quem invocátum est nomen tuum, Deus."

Secreta:

Majestátem tuam, Dómine, supplíciter deprecámur: ut hæc sancta, quæ gérimus, et a prætéritis nos delíctis éxuant, et futúris. Per Dóminum.

2. ad poscenda suffragia Sanctorum. 3. ad libitum eligenda

Præfatio de Ssma Trinitate

 Communio: Ps. lxxv: 12 et 13

Vovéte, et réddite Dómino Deo vestro omnes, qui in circúitu ejus affértis múnera: terríbili, et ei qui aufert spíritum príncipum: terríbili apud omnes reges terræ.

Postcommunio:

Sanctificatiónibus tuis, omnípotens Deus, et vítia nostra curéntur, et remédia nobis ætérna provéniant. Per Dominum.

2. ad poscenda suffragia Sanctorum. 3. ad libitum eligenda