Orationes in Missis de B.M.V. in Sabbato

de Spiritu Sancto: Oratio

Deus, qui hodiérna die corda fidélium Sancti Spíritus illustratióne docuísti: da nobis in eódem Spíritu recta sápere; et de ejus semper consolatióne gaudére. Per Dóminum ... in unitáte ejúsdem.

contra persecutores Ecclesiæ: Oratio

Ecclésiæ tuæ, quǽsumus, Dómine, preces placatus admítte: ut, destrúctis adversitatibus et erróribus univérsis, secúra tibi sérviat libertate.

vel pro Papa: Oratio

Deus, ómnium fidélium pastor et rector, famulum tuum N., quem pastórem Ecclésiæ tuæ præésse voluísti, propítius réspice: da ei, quǽsumus, verbo et exemplo quibus præest profícere; ut ad vitam, una cum grege sibi crédito, pervéniat sempitérnam.

---

de Spiritu Sancto: Secreta

Múnera, quǽsumus, Dómine, obláta sanctífica: et corda nostra Sancti Spíritus illustratióne emúnda. Per Dóminum ... in unitáte ejúsdem.

contra persecutores Ecclesiæ: Secreta

Prótege nos, Dómine, tuis mystériis serviéntes: ut divínis rebus inhæréntes, et córpore tibi famulémur, et mente.

vel pro Papa: Secreta

Oblatis, quǽsumus, Dómine, placare munéribus: et famulum tuum N., quem pastorem Ecclésiæ tuæ præésse voluísti, assídua protectióne gubérna.

---

de Spiritu Sancto: Postcommunio

Sancti Spíritus, Dómine, corda nostra mundet infúsio: et sui roris íntima aspersíone fœcúndet. Per Dóminum ... in unitáte ejúsdem.

contra persecutores Ecclesiæ: Postcommunio

Quǽsumus, Dómine Deus noster: ut, quos divína tribuis participatióne gaudére; humanis non sinas subjacére perículis. Per Dóminum.

vel pro Papa: Postcommunio

Hæc nos quǽsumus, Dómine, divini sacraménti percéptio prótegat: et famulum tuum N., quem pastórem Ecclésiæ tuæ præésse voluísti; una cum commísso sibi grege, salvet semper, et múniat.  Per Dóminum.