Additional Prayers for the Season of Advent
In Masses of the season and in votive Masses not pro re gravi et publica causa, 
unless otherwise indicated in the text of specific Masses.

Orationes in Tempore Adventus

Oratio II: de Sancta Maria

Deus, qui de beátæ Maríæ Vírginis útero Verbum tuum, Angelo nuntiánte, carnem suscípere voluísti: præsta supplícibus tuis; ut, qui vere eam Genetrícem Dei crédimus, ejus apud te intercessiónibus adjuvémur.

Oratio III: Contra persecutores Ecclesiæ

Ecclésiæ tuæ, quǽsumus, Dómine, preces placátus admítte: ut, destrúctis adversitátibus et erróribus univérsis, secúra tibi sérviat libertáte.

vel Oratio III: Pro Papa

Deus, ómnium fidélium pastor et rector, fámulum tuum N., quem pastórem Ecclésiæ tuæ præésse voluísti, propítius réspice: da ei, quǽsumus, verbo et exemplo quibus præest profícere; ut ad vitam, una cum grege sibi crédito, pervéniat sempitérnam.

 

---

Secreta II: de Sancta Maria

In méntibus nostris, quǽsumus, Dómine, veræ fídei sacraménta confirma: ut, qui concéptum de Vírgine Deum verum et hóminem confitémur; per ejus salutíferæ resurrectiónis poténtiam, ad ætérnam mereámur perveníre lætítiam.

Secreta III: Contra persecutores Ecclesiæ

Prótege nos, Dómine, tuis mystériis serviéntes: ut divínis rebus inhæréntes, et córpore tibi famulémur, et mente.

vel Secreta III: Pro Papa

Oblátis, quáesumus, Dómine, placáre munéribus: et fámulum tuum N., quem pastorem Ecclésiæ tuæ præésse voluísti, assídua protectióne gubérna.

 

---

Postcommunio II: de Sancta Maria

Grátiam tuam, quǽsumus, Dómine, méntibus nostris infúnde: ut qui, Angelo nuntiánte, Christi Fílii tui incarnatiónem cognóvimus; per passiónem ejus et crucem, ad resurrectiónis glóriam perducámur.

Postcommunio III: Contra persecutores Ecclesiæ

Quǽsumus, Dómine Deus noster: ut, quos divína tribuis participatióne gaudére; humánis non sinas subjacére perículis.

vel Postcommunio III: Pro Papa

Hæc nos quáesumus, Dómine, divini sacraménti percéptio prótegat: et fámulum tuum N., quem pastórem Ecclésiæ tuæ præésse voluísti; una cum commísso sibi grege, salvet semper, et múniat.