Regína sacratíssimi Rosárii, ora pro nobis!
  

Dominica Prima Octobris, vel Die 7 Octobris
Sacratissimi Rosarii Beatæ Mariæ Virginis
I Classis

English Text
Blessing of Rosary Beads

Introitus:

Gaudeámus omnes in Dómino diem festum celebrantes sub honóre beátæ Maríæ Vírginis: de cujus solemnitáte gaudent Angeli, et colláudant Fílium Dei. [Ps. xliv, 2]. Eructávit cor meum verbum bonum: dico ego ópera mea Regi. Gloria Patri. Gaudeámus.

Collect:

Deus, cujus Unigénitus per vitam, mortem, et resurrectiónem suam nobis salútis ætérnæ præmia comparávit: concéde, quæsumus; ut, hæc mystéria sacratíssimo beátæ Maríæ Vírginis Rosário recoléntes, et imitémur quod cóntinent, et quod promíttunt, assequámur.

Prov. viii: 22-24 et 32-35

    Léctio libri Sapiéntiæ.
Dóminus possédit me in inítio viárum suárum, ántequam quidquam fáceret a princípio. Ab ætérno ordináta sum, et ex antíquis, ántequam terra fíeret. Nondum erant abýssi, et ego jam concépta eram. Nunc, ergo, fílii audíte me: Beáti, qui custódiunt vias meas. Audíte disciplínam, et estóte sapiéntes, et nolíte abjícere eam. Beátus homo qui audit me, et qui vígilat ad fores meas quotídie, et obsérvat ad postes óstii mei. Qui me invénerit, invéniet vitam, et háuriet salútem a Dómino.

Graduale Ps. xliv: 5, 11, et 12

Propter veritátem, et mansuetúdinem, et justítiam: et dedúcet te mirabíliter déxtera tua. V. Audi, fília, et vide, et inclína aurem tuam: quia concupívit Rex spéciem tuam.
Allelúja, allelúja. Solémnitas gloriósæ Vírginis Maríæ ex sémine Abrahæ, ortæ de tribu Juda, clara ex stirpe David. Allelúja.

  Luc. i: 26-38

    +    Sequéntia sancti Evangélii secúndum Lucam.
In illo témpore: missus est angelus Gábriel a Deo in civitátem Galilǽæ, cui nomen Názareth, ad virginem desponsátam viro cui nomen erat Joseph, de domo David, et nomen Vírginis María. Et ingréssus Angelus ad eam, dixit: "Ave, grátia plena: Dóminus tecum: benedícta tu in muliéribus." Quæ cum audísset, turbáta est in sermóne ejus et cogitábat, qualis esset ista salutátio. Et ait angelus ei: "Ne tímeas María, invenísti enim grátiam apud Deum: ecce concípies in utero et páries fílium et vocábis nomen ejus Jesum. Hic erit magnus, et Fílius Altíssimi vocábitur, et dabit illi Dóminus Deus sedem David patris eius: et regnábit in domo Jacob in aetérnum et regni ejus non erit finis." Dixit autem María ad angelum: "Quomodo fiet istud, quóniam virum non cognósco?" Et respóndens angelus, dixit ei: "Spíritus Sanctus supervéniet in te, et virtus Altíssimi obumbrábit tibi. Ideóque et quod nascétur ex te Sanctum, vocábitur Fílius Dei. Et ecce Elísabeth cognáta tua, et ipsa concépit fílium in senectúte sua: et hic mensis est sextus illi quae vocátur stérilis: quia non erit inpossíbile apud Deum omne verbum." Dixit autem María: "Ecce ancílla Dómini, fiat mihi secúndum verbum tuum."

Credo.

Offertorium: Eccli: xxiv: 25; xxxix: 17

In me grátia omnis viæ et veritátis, in me omnis spes vitæ et virtútis: ego quasi rosa plantáta super rivos aquárum fructificávi.

Secreta:

Fac nos quæsumus, Dómine, his munéribus offeréndis conveniénter aptári: et per sacratíssimi Rosárii mystéria sic vitam, passiónem, et glóriam Unigéniti tui recólere; ut ejus digni promissiónibus efficiámur.

Præfatio de Beata Maria Virg. "et te in Festivitate."

Communio: Eccli: xxxix: 19

Floréte flores quasi lílium, et date odórem, et frondéte in grátiam, collaudáte cánticum, et benedícite Dóminum in opéribus suis.

Postcommunio:

Sanctísimæ Genítricis tuæ, cujus Rosárium celebrámus, quæsumus, Dómine, précibus adjuvémur: ut et mysteriórum, quæ cólimus, virtus percipiátur; et sacramentórum, quæ súmpsimus, obtineátur efféctus: Qui vivis....

 



Dei via est íntegra
Our Lady of the Rosary, 144 North Federal Highway (US#1), Deerfield Beach, Florida 33441  954+428-2428
Authentic  Catholic Mass, Doctrine, and Moral Teaching -- Don't do without them -- 
Don't accept one without the others!