Die 23 Junii
In Vigília Nativitátis Joánnis Baptistæ
Introitus: Luc i: 13,15, et14
N e tímeas, Zacharía exaudíta est orátio tua:
et Elisabeth uxor tua páriet tibi fílium, et vocábis nomen ejus Joánnem: et
erit magnus coram Dómino: et Spíritu Sancto replébitur adhuc ex útero matris
suæ: et multi in nativitáte ejus gaudébunt. v.
[Ps. xx: 2] Dómine, in virtúte tua lætábitur rex: et super
salutáre tuum exsultábit veheménter. v.
Gloria Patri. Ne tímeas, Zacharía.
Oratio
P ræsta, quǽsumus, omnípotens Deus: ut
família tua per viam salútis incédat; et, beáti Joánnis Præcursóris
hortaménta sectándo, ad eum quem prædíxit, secúra pervéniat, Dóminum
nostrum Jesum Christum Fílium tuum. Qui tecum.
2° de Beata María, 3° contra persecutores Ecclesiæ, vel
Pro Papa
Jerem. i: 4-10
Léctio Jeremiæ Prophétæ.
In diébus illis: Factum est verbum
Dómini ad me, dicens: «Priúsquam te formárem in útero, novi te: et
ántequam exires de vulva, sanctificávi te et prophétam in géntibus dedi te.»
Et dixi: «A, a, a, Dómine Deus: ecce néscio loqui, quia puer ego sum.» Et
dixit Dóminus ad me: «Noli dicere: Puer sum: quóniam ad ómnia, quæ mittam
te, ibis: et univérsa, quæcúmque mandávero tibi, loquéris. Ne timeas a
fácie eórum: quia tecum ego sum, ut éruam te, dicit Dóminus.» Et misit
Dóminus manum suam, et tétigit os meum: et dixit Dóminus ad me: «Ecce dedi
verba mea in ore tuo: ecce constítui té hódie super gentes, et super regna,
ut evéllas, et déstruas, et dispérdas, et díssipes, et ædífices, et
plantes: dicit Dóminus omnípotens.»
Graduale: Joann. i: 6-7
F uit homo missus a Deo, cui nomen erat Joánnes.
v. Hic venit ut testimónium perhibéret de
lúmine, paráre Dómino plebem perféctam.
Luc. i: 5-17
+
Inítium sancti Evangélii Secúndum Lucam
F uit in diébus Heródis, regis Judǽæ,
sacérdos quidam nómine Zacharias, de vice Abía, et uxor illíus de filiábus
Aaron, et nomen ejus Elísabeth. Erant autem justi ambo ante Deum, incedéntes
in ómnibus mandátis, et justificatiónibus Dómini sine queréla, et non erat
illis fílius, eo quod esset Elísabeth stérilis, et ambo processíssent in
diébus suis. Factum est autem, cum sacerdótio fungerétur in órdine vicis
suæ ante Deum, secúndum consuetúdinem sacerdótii, sorte éxiit, ut incénsum
póneret ingréssus in templum Dómini: et omnis multitúdo pópuli erat orans
foris hora incénsi. Appáruit autem illi Angelus Dómini, stans a dextris
altáris incénsi. Et Zacharías turbátus est, videns, et timor írruit super
eum. Ait autem ad illum Angelus: «Ne tímeas, Zacharía, quóniam exaudíta est
deprecátio tua: et uxor tuo Elísabeth páriet tibi fílium, et vocábis nomen
ejus Joánnem: et erit gáudium tibi, et exsultátio, et multi in nativitáte
ejus gaudébunt: erit enim magnus coram Dómino: et vinum et síceram non bibet
et Spíritu Sancto replébitur adhuc ex útero matris suæ: et multos fíliórum
Israël convértet ad Dóminum Deum ipsórum: et ipse præcédet ante illum in
spíritu, et virtúte Elíæ: ut convértat corda patrum in fílios et
incrédulos ad prudéntium justórum, paráre Dómino plebem perféctam.»
Offertorium: Ps. viii: 6-7
G lória et honóre coronásti eum: et
constituísti eum super ópera mánuum tuárum, Dómine.
Secreta
M únera Dómine, obláta sanctífica: et,
intercedénte beáto Joánne Baptísta, nos per hæc a peccatórum nostrórum
máculis emúnda. Per Dóminum.
2° de Beata María, 3° contra persecutores Ecclesiæ, vel
Pro Papa
Praefatio Communis
Communio: Ps xx: 6
M agna est glória ejus in salutári tuo:
glóriam et magnum decórem impónes super eum, Dómine.
Postcommunio
B eáti Joánnis Baptístæ nos, Dómine,
præclára comitétur orátio: et quem ventúrum esse prædíxit, poscat nobis
fore placátum, Dóminum nostrum Jesum Christum Fílium tuum: Qui tecum
2° de Beata María, 3° contra persecutores Ecclesiæ, vel
Pro Papa
|
