Die 15 Junii
Ss. Viti, Modesti, atque Crescentiæ,
Martyrum
III Classis

Introitus: Ps. xxxiii: 20-21

Multæ tribulatiónes justórum, et de his ómnibus liberávit eos Dóminus: Dóminus custódit ómnia ossa conterétur. [Ps. ibid., 2] Benedícam Dóminum in omni témpore: semper laus ejus in ore meo. v. Glória Patri. Multæ tribulatiónes.

Oratio:

Da Ecclésiæ tuæ, quǽsumus, Dómine, sanctis Martýribus tuis Vito, Modésto atque Crescéntia intercedéntibus, supérbe non sápere, sed tibi plácita humilitáte profícere: ut, prava despíciens, quæcúmque recta sunt, líbera exérceat caritáte. Per Dóminum

Ecclesiasticus iii: 1-8

Lectio libri Sapiéntiæ.
Justórum ánimæ in manu Dei sunt, et non tanget illos torméntum mortis. Visi sunt óculis insipiéntium mori: et æstimáta est afflíctio éxitus illórum: et quod a nobis est iter, extermínium: illi autem sunt in pace. Et si coram homínibus torménta passi sunt, spes illórum immortalitáte plena est. In paucis vexáti, in multis bene disponéntur: quóniam Deus tentávit eos, et invénit illos dignos se. Tamquam aurum in furnáce probávit illos, et quasi holocáusti hóstiam accépit illos, et in témpore erit respéctus illórum. Fulgébunt justi, et tamquam scintíllæ in arundinéto discúrrent. Judicábunt natiónes, et dominabúntur populis, et regnábit Dóminus illórum in perpétuum.

Graduale Ps. cil: 5 et 1

Exsultábunt sancti in glória: Lætabúntur in cubílibus suis. V. Cantáte Dómino cánticum novum: laus ejus in ecclésia sanctórum.
Allelúja, allelúja. [Ps. cxliv: 10-11] Sancti tui, Dómine, benedícent te: glóriam regni tui dicent. Allelúja.

Luc. x: 16-20
+ Sequéntia sancti Evangélii secúndum Lucam.

In illo témpore: Dixit Jesus discípulis suis: «Qui vos audit, me audit: et qui vos spernit, me spernit. Qui autem me spernit, spernit eum qui misit me.» Revérsi sunt autem septuagínta duo cum gáudio, dicéntes: «Dómine, étiam dæmónia subjiciúntur nobis in nómine tuo.» Et ait illis: «Vidébam Sátanam sicut fulgur de cælo cadéntem. Ecce dedi vobis potestátem calcándi supra serpéntes et scorpiónes et supra omnem virtútem inimíci: et nihil vobis nocébit. Verúmtamen in hoc nolíte gaudére quia spíritus vobis subjiciúntur: gaudéte autem quod nómina vestra scripta sunt in cælis.»

Offertorium: Ps. lxvi: 36.

Mirábilis Deus in sanctis suis: Deus Israël ipse dabit virtútem, et fortitúdinem plebi suæ: benedíctus Deus.

Secreta:

Sicut glóriam divínæ poténtiæ múnera pro Sanctis obláta testántur: sic nobis efféctum, Dómine, tuæ salvatiónis impéndant. Per Dóminum.

Praefatio Communis

Communio: Sap. iii: 1-2 et 3

Justórum ánimæ in manu Dei sunt, et non tanget illos torméntum malítiæ: visi sunt óculis insipiéntium mori: illi autem sunt in pace.

Postcommunio:

Repléti, Dómine, benedictióne solémni: quǽsumus; ut per intercessiónem sanctórum Mártyrum, Viti, Modésti et Crescéntiæ, medicína sacraménti et corpóribus nostris prosit, et méntibus. Per Dóminum.

Tempore Paschali Missa Sancti tui de Communi Martyrum 2° loco, cum Orationibus et Evangelio ut in Missa præcedenti.