Die 12 Junii
S. Joánnis a S. Facundo, Confessóris

Missa Os justi de Commune Confessoris non Pontificis 1° loco præter Orationem sequentem:

Oratio (P):

Deus, auctor pacis, et amátor caritátis, qui beátum Joánnem Confessórem tuum mirífica dissidéntes componéndi grátia decorásti: ejus méritis et intercessióne concéde; ut in tua caritáte firmáti, nullis a te tentatiónibus separémur. Per Dóminum.

Oratio: Ss. : Basílidis, Cyríni, Náboris, et Nazárii, MM

Sanctórum Mártyrum tuórum Basílidis, Cyríni, Náboris atque Nazárii, quǽsumus, Dómine, natalítia nobis votíva respléndeant: et, quod illis cóntulit excelléntia sempitérna frúctibus nostræ devotiónis accréscat. Per Dóminum.

Secreta (C):

Laudis tibi, Dómine, hóstias immolámus in tuórum commemoratióne Sanctórum: quibus nos et præséntibus éxui malis confídimus, et futúris. Per Dóminum.

Secreta: Ss. : Basílidis, Cyríni, Náboris, et Nazárii

Pro sanctórum tuórum Basílidis, Cyríni, Náboris atque Nazárii, sánguine venerándo, hóstias tibi, Dómine, solémniter immolámus, tua mirabília pertractántes: per quem talis est perfécta victória. Per Dóminum.

Praefatio Communis

Postcommunio (C):

Refécti cibo, potúque cælésti, Deus noster, te súpplices exorámus: ut, in cujus hæc commemoratióne percépimus, ejus muniámur et précibus. Per Dóminum.

Postcommunio: Ss. : Basílidis, Cyríni, Náboris, et Nazárii

Semper, Dómine, sanctórum tuórum Basílidis, Cyríni, Náboris atque Nazárii,solémnia celebrántes: præsta, quǽsumus; ut eórum patrocínia júgiter sentiámus. Per Dóminum.